دنیا میں بولی جانے والی زبانیں

 

دنیا میں  بولی جانے والی زبانیں

زبا ن کی تعریف:

 بولنے، بات کرنے، اپنے احساسات، جذبات وخیالات کو دوسروں تک پہنچانے  کے صوتی اور لفظی وسیلے کو زبان کہتے ہیں۔

مادری زبان:

مادری زبان کسی بھی شخص کی وہ زبان ہوتی ہے جو اسے اپنے گھر اور خاندان سے ورثے میں ملتی ہے۔مختلف اعداد و شمار کے مطابق دنیا میں سب سے زیادہ بولی جانے والی مادری زبان چینی ہے جسے دنیا کی 16 فیصد آبادی یعنی 1 ارب 20 کروڑ افراد بولتے اور سمجھتے ہیں۔
اس کے بعد 42 کروڑ 50 لاکھ ہندی، 43 کروڑ ہسپانوی، 34 کروڑ انگریزی اور 20 کروڑ افراد عربی بولتے ہیں۔ پنجابی 11 اور اردو بولی جانے والی زبانوں میں 19 ویں نمبر پر ہے۔

دنیا میں بولی جانے والی زبانوں  کی تعداد:

ایک جائزے کے مطابق دنیا میں اس وقت کُل چھ ہزار آٹھ سو نو زبانیں بولی جاتی ہیں۔ ایک اور جائزے کے مطابق دنیا میں تقریباً 6500 زبانیں بولی جاتی ہیں جبکہ آکسفورڈ یونیورسٹی کی ایک تحقیق کے مطابق دنیا بھر میں تقریباً 6 ہزار 9 سو 12 زبانیں بولی جاتی ہیں۔

دنیا میں بولی جانے والی بڑی زبانیں :

چین میں بولی جانے والی مینڈرین زبان آبادی کے لحاظ سے دنیا کی سب سے بڑی زبان سمجھی جاتی ہے جبکہ انگریزی زبان دوسرے نمبر پر آتی ہے۔ "اردو – ہندی" کو اگر ایک زبان تصور کیا جائے تو آبادی کے لحاظ سے تیسرا نمبر  اس کا بنتا ہے لیکن اگر ہندی کو الگ زبان کے طور پر دیکھا جائے تو عالمی زبانوں کی فہرست میں اس کا نمبر چھٹا بنتا ہے (پانچویں نمبر پر بنگالی ہے) اور اردو بائیسویں نمبر پر چلی جاتی ہے۔اس کے علاوہ عربی اور ہسپانوی زبانوں  کا شمار بھی بڑی  زبانوں میں ہوتا ہے ۔

سب سے زیادہ زبانیں  کہاں بولی جاتی ہیں:

گوگل رپورٹ کے مطابق دنیا میں سب سے زیادہ زبانیں پاپوانیوگنی میں بولی جاتی ہیں ،جن کی تعداد 820 ہے،دوسرے نمبر پر انڈونیشیا ہے ،جہاں لوگ 742 مختلف زبانیں بولتے ہیں،تیسرے نمبرپر نائیجریا ہے، جہاں کے  لوگ516 زبانوں میں بات کرتے ہیں۔ ایک اور روپورٹ  کے مطابق دنیا میں سب سے زیادہ 860زبانیں پاپوا نیو گنی، دوسرے نمبر پر انڈونیشیا جہاں  516  زبانیں  ،  تیسرے  نمبر  پر نائیجیریا  جہاں  425  زبانیں   بولی جاتی ہیں ۔

ربیکا سولنٹ اور جوشوا جیلی شاپیرو کی شائع کردہ ’’نان اسٹاپ میٹروپولس: اے نیویارک سٹی اٹلس‘‘ میں منفرد انداز سے جائزہ لے کر بتایا گیا ہے کہ نیویارک سٹی کے علاقے کوینز میں بولی جانے والی زبانوں کی تعداد سب سے زیادہ یعنی تقریباً 800 ہے۔ 460 مربع کلومیٹر رقبے پر پھیلے ہوئے علاقے کوینز کی آبادی 23 لاکھ 40 ہزار نفوس پر مشتمل ہے لیکن حیرت انگیز طور پر یہ لسانیاتی تنوع کے اعتبار سے صرف امریکا ہی نہیں بلکہ دنیا بھر میں سب سے بھرپور ہے۔ سولنٹ کے مطابق صرف کوینز میں جتنی زبانیں بولی جاتی ہیں اتنی دنیا کے کسی ملک میں ایک ساتھ نہیں بولی جاتیں۔

بھارتی اخبار کے مطابق 1903 ءسے 1928ءکے دوران کئے گئے انڈین سول سروس کے افسر گریرسن کے سروے میں بتایاگیا تھاکہ بھارت میں 733 زبانیں بولی جاتی ہیں، اب مزید 47 نئی زبانیں دریافت ہوئی ہیں ،جس کے بعد ملک میں 780 زبانیں بولی جاتی ہیں۔

 پاکستانی ماہرین لسانیات کے مطابق ملک میں مختلف لہجوں کے فرق سے 74 زبانیں بولی جاتی ہیں۔

 

ایک سے زیادہ ممالک میں بولی  جانے والی زبانیں:

زیادہ ممالک  میں بولی جانے والی زبانوں کی درجہ بندی:

نمبر شمار	زبان	ممالک کی تعداد
1	انگریزی	59
2	فرانسیسی	29
3	عربی	25
4	ہسپانوی	24
5	رشین	12
6	پرتگالی	11
12	جرمن	7
13	اطالوی	6
14	چینی	4
15	ڈچ	3

 

انٹرنیٹ  پر زبان  کے  استعمال کے لحاظ درجہ بندی:

زبان کے لحاظ سے انٹرنیٹ استعمال  کرنے  والوں کی درجہ بندی کچھ یوں ہے:

نمبر شمار	زبان	تعداد
1	انگریزی	1،186،451،052
2	چینی	888،453،068
3	سپینش	363،684،593
4	عربی	237،418،349
5	پرتگیزی	171،750،818
6	انڈونیشین/ ملائیشین	198،029،815
7	فرنچ	151،733،611
8	جاپانی	118،626،672
9	رشین	116،353،942
10	جرمن	92،525،427

 

 ختم ہوتی زبانیں:

اقوام متحدہ کے مطابق دنیا بھر میں ہر 2 ہفتے میں ایک زبان اپنی تمام تر ثقافت اور ادب سمیت  ختم ہوجاتی ہے۔نوے فیصد زبانیں ایسی ہیں جن کے بولنے والوں کی تعداد ایک لاکھ سے کم ہے۔ 537زبانیں ایسی ہیں جن کے بولنے والے پچاس سے بھی کم رہ گئے ہیں، لیکن زیادہ افسوس ناک حالت ان 46 زبانوں کی ہے جو آئندہ چند برسوں میں ختم ہونے والی ہیں کیونکہ ان کو بولنے والا صرف ایک ایک انسان باقی ہے۔ایک سروے کے مطابق بھارت میں قدیم ترین زبان سنسکرت بولنے والوں کی تعداد 10 ہزار رہ گئی ہے۔ اندازہ ہے کہ گزشتہ ایک صدی کے دوران بھارت میں ایک سو سے دو سو زبانیں  ختم ہو چکی ہیں۔آکسفورڈ یونیورسٹی کی ایک تحقیق کے مطابق دنیا بھر میں 516  زبانیں ناپید ہوچکی ہیں۔ یونیسکو کے مطابق ہر 14 دن بعد دنیا میں بولی جانے والی ایک زبان  ختم ہوجاتی ہے۔
ذرائع:بی بی سی ڈاٹ کام،اردوصفحہ ڈاٹ پی کے،روزنامہ جنگ،اردو پوائنٹ ڈاٹ کام،ساٹیسٹا ڈاٹ کام،ورلڈ وائڈ سٹیٹس ڈاٹ کام،اردوڈاٹ سیاست ڈاٹ کام،اردو نوٹس ڈاٹ کام۔